पालघर जिल्ह्यातील डहाणू आणि केळवे पोलीस स्टेशन हद्दीत झालेल्या घरफोडीच्या घटनांची उकल करण्यात पोलिसांना यश आले आहे.यामध्ये एकूण चार आरोपीना अटक करण्यात आली असून त्यांच्याकडून जवळपास अर्धा किलो सोने चांदीचे जप्त केले आहेत.
डहाणू पोलीस स्टेशन हद्दीत ३ ऑक्टोबर रोजी डहाणू किल्ला भागातील मिलिंद अरविंद करंदीकर यांच्या घराच्या पहिल्या माळ्यावरील बेडरूममधील बाथरूमच्या काचा काढून आतमध्ये शिरलेल्या चोरट्यांनी लोखंडी कपाटाच्या लॉकरमधले ८ लाख १२ हजार रुपये किंमती चे सोने चांदीचे दागिने चोरी करून नेले होते.याबाबत डहाणू पोलीस स्टेशन येथे गुन्हा दाखल झाला होता.पोलिस अधीक्षक बाळासाहेब पाटील यांच्या आदेशानुसार उपविभागीय पोलीस अधिकारी प्रशांत परदेशी,उप अधीक्षक (गृह) शैलेश काळे यांच्या मार्गदर्शनाखाली पोलीस निरीक्षक नामदेव बंडगर यांनी विविध पथके तयार करून या गुन्ह्यात कोणताही पुरावा उपलब्ध नसताना कौशल्यपूर्ण तांत्रिक तपास करून सुरेश पाटील,डहाणू आणि आकाश सावंत,मीरा रोड या दोन चोरांना अटक केली आहे.त्यांच्याकडून ६,४८,३१५ रुपये किंमतीचे सोन्या-चांदीचे दागिने हस्तगत करण्यात यश आले आहे.
तर घरफोडीच्या दुसऱ्या घटनेत केळवे पोलीस स्टेशन हद्दीतील खटाळी येथील जिग्नेश दीपक बारी हे कुटुंबासहित नवरात्रीच्या आरतीसाठी दांडा खटाळी येथे गेले असताना चोरट्यांनी त्यांच्या घराच्या बेडरूमची बंद खिडकी उघडून घरातील कपाटातील दागिने व रोख रक्कम असा एकूण ६४ हजार रुपयांचा मुद्देमाल चोरून नेला होता.केळवे परिसरातील वाढत्या चोरींचे गांभिर्य लक्षात घेऊन पोलीस अधीक्षक बाळासाहेब पाटील व अपर पोलीस अधीक्षक प्रकाश गायकवाड यांच्या आदेशाने तसेच उपविभागीय पोलीस अधिकारी नीता पाडवी, स्थानिक गुन्हे शाखा पालघरचे पोलीस निरीक्षक अनिल विभूते, सहाय्यक पोलिस निरीक्षक सतीश गवई यांनी वेगवेगळी पथके तयार करून चोरीच्या गुन्ह्यांचा तपास सुरू केला होता.पालघर जिल्ह्यात पोलिसांकडून सुरू असलेल्या जनसंवाद अभियानामुळे प्राप्त झालेल्या सीसीटीव्ही फुटेज मधून यातील एक चोर हा स्थानिक नागरिकांच्या ओळखीचा असल्याचे निष्पन्न झाले होते.त्यानुसार कौशल्यपूर्ण तपास करीत अजय पाटील विरार आणि कुमार कोनार मीरा रोड या दोघांना ताब्यात घेत कसून चौकशी केली असता आरोपीनी एकूण १५ चोरीच्या गुन्ह्याची कबुली दिली असून एकूण १५,०८,६०० रुपयांचे दागिने हस्तगत करण्यात आले आहेत.
