डहाणू तालुक्यातील मार्क्सवादी कम्युनिस्ट पक्षाचा सदस्य डॉ.आदित्य अहिरे याची पक्षातून हकालपट्टी करण्यात आली आहे. त्याच्यावर पक्षाचा नावाचा गैरवापर करीत असल्याच्या तक्रारी आल्यानंतर ही कारवाई करण्यात आली.
नुकतीच आशागड या ठिकाणी भारताच्या कम्युनिस्ट पक्ष (मार्क्सवादी) चे डहाणू तालुका सेक्रेटरी कॉ.रडका कलांगडा यांच्या अध्यक्षतेखाली तालुका कमिटीची बैठक पार पडली.या बैठकीमध्ये बहुमताने निर्णय घेऊन डॉ.आदित्य अहिरे याची पक्षातून हकालपट्टी करण्यात आल्याचा निर्णय घेण्यात आला.
डॉ.आदित्य अहिरे याने पक्षाच्या नावाचा गैरवापर करीत पक्षांमध्ये कुरघोडी करून पक्षश्रेष्ठींचे आदेश डावलून अनेकांना कारवाईची धमकी देत तो मोठ्या प्रमाणात अर्थकरणं करत असल्याच्या तक्रारी पक्षाला प्राप्त होत होत्या. त्याच्यामुळे पक्षाचे विनाकारण नाव बदनाम होत होते. याची गंभीर दखल कॉ.रडका कलांगडा यांच्या अध्यक्षतेखाली झालेल्या बैठकीत घेऊन ही कारवाई करण्यात आली. डॉ.अहिरे हा या आधी शिवसेना पक्षाच्या युवासेनेचा पदाधिकारी असताना देखील त्याच्याविरोधात असेच आरोप होत होते.
